இந்தியாவின் சுதந்திரத்திற்காக ஆங்கிலேய ஆதிக்கத்தைத் துணிச்சலுடன் எதிர்த்துப் போராடியவரும், வீரமும் விவேகமும் நிறைந்தவருமான வீரபாண்டிய கட்டபொம்மனின் 227-வது நினைவு நாளையொட்டி, 16.10.2026 வெள்ளிக்கிழமை காலை 10 மணியளவில், தூத்துக்குடி மாவட்டம் கயத்தாறில் அமைந்துள்ள அவரது மணிமண்டபத்தில் உள்ள திருவுருவச் சிலைக்கு அனைத்திந்திய அண்ணா திராவிட முன்னேற்றக் கழகத்தின் சார்பில் மாலை அணிவித்து, மலர் தூவி மரியாதை செலுத்தப்படுகிறது.

இந்நிகழ்ச்சிக்கான ஏற்பாடுகளை, அதிமுக அமைப்புச் செயலாளரும், தூத்துக்குடி தெற்கு மாவட்டச் செயலாளரும், தூத்துக்குடி வடக்கு மாவட்டச் செயலாளர் பொறுப்பில் உள்ளவருமான எஸ்.பி.சண்முகநாதன் மேற்கொள்கிறார்.

வீரபாண்டிய கட்டபொம்மனுக்கு மரியாதை செலுத்தும் இந்நிகழ்ச்சியில், தூத்துக்குடி வடக்கு மற்றும் தெற்கு மாவட்டங்களைச் சேர்ந்த கட்சி நிர்வாகிகள், முன்னாள் நாடாளுமன்ற மற்றும் சட்டமன்ற உறுப்பினர்கள், கட்சியின் சார்பு அமைப்புகளின் மாநில நிர்வாகிகள், உள்ளாட்சி அமைப்புகளின் தற்போதைய மற்றும் முன்னாள் பிரதிநிதிகள், கட்சித் தொண்டர்கள் மற்றும் பொதுமக்கள் பெருந்திரளாகக் கலந்துகொள்ள வேண்டும் என அதிமுக பொதுச்செயலாளர் எடப்பாடி பழனிசாமி கேட்டுக்கொண்டுள்ளார்.