விஜயதசமி பண்டிகையை முன்னிட்டு ஆர்.எஸ்.எஸ். அமைப்பினர் ஆண்டுதோறும் ஊர்வலம் நடத்துவது வழக்கம். இந்த ஆண்டு அக்டோபர் 18, 25 அல்லது நவம்பர் 1 ஆகிய தேதிகளில் தமிழகம் முழுவதும் அணிவகுப்பு நடத்த அனுமதி கோரி, அந்த அமைப்பின் சார்பில் டிஜிபியிடம் விண்ணப்பம் அளிக்கப்பட்டதாகக் கூறப்படுகிறது. ஆனால், காவல்துறை தரப்பில் பதில் அளிக்கப்படாததால், அனுமதி வழங்க உத்தரவிடக் கோரி ஆர்.எஸ்.எஸ். மாநிலச் செயலாளர் ஜெகதீசன் சென்னை உயர் நீதிமன்றத்தில் மனு தாக்கல் செய்தார்.

இந்த மனு கடந்த 14-10-2026 அன்று நீதிபதி லட்சுமி நாராயணன் முன்பு விசாரணைக்கு வந்தது. அப்போது, ஜம்மு காஷ்மீரில் கூட ஆர்.எஸ்.எஸ். அணிவகுப்புக்கு அனுமதி அளிக்கப்படும் நிலையில், தமிழகத்தில் ஏன் அனுமதி மறுக்கப்படுகிறது என நீதிபதி கேள்வி எழுப்பினார்.

மேலும், இந்த விவகாரத்தில் அரசு தரப்பும் மனுதாரர் தரப்பும் பேச்சுவார்த்தை நடத்தி முடிவைத் தெரிவிக்குமாறு உத்தரவிட்டு விசாரணையை ஒத்திவைத்தார்.

இதையடுத்து, கடந்த 15-10-2026 அன்று நடைபெற்ற விசாரணையின்போது, வட மாவட்டங்களில் அக்டோபர் 25-ஆம் தேதியும், தென் மாவட்டங்களில் நவம்பர் 1-ஆம் தேதியும் அணிவகுப்பு நடத்தத் திட்டமிடப்பட்டுள்ளதாகக் காவல்துறை தரப்பில் தெரிவிக்கப்பட்டது. மேலும், சட்டம் ஒழுங்கைக் கருத்தில் கொண்டு 58 இடங்களில் அனுமதி மறுக்கப்பட்டுள்ளதாகவும் விளக்கம் அளிக்கப்பட்டது.

இந்நிலையில், இந்த வழக்கு இன்று (16-10-2026) மீண்டும் விசாரணைக்கு வந்தது. அப்போது காவல்துறையின் முடிவை ஏற்றுக்கொண்ட நீதிபதி லட்சுமி நாராயணன், தமிழகத்தில் 128 இடங்களில் ஆர்.எஸ்.எஸ். அமைப்பினர் அணிவகுப்பு நடத்த அனுமதி அளித்து உத்தரவிட்டார்.

இதன்படி, அக்டோபர் 25 மற்றும் நவம்பர் 1 ஆகிய தேதிகளில் தமிழகத்தின் பல்வேறு பகுதிகளில் ஆர்.எஸ்.எஸ். அணிவகுப்பு நடைபெற உள்ளது